हालै अन्तर्राष्ट्रिय मुद्रा कोषले सार्वजनिक गरेको विश्वव्यापी जीडीपी तथ्यांक अनुसार भारत विश्वको छैटौँ ठूलो अर्थतन्त्रमा झरेको देखिएको छ। एक वर्षअघि मात्र चौथो स्थानमा रहेको भारत अहिले संयुक्त राज्य अमेरिका, चीन, जर्मनी, जापान र बेलायत पछि परेको हो। तर यो गिरावटलाई अर्थतन्त्र कमजोर भएको संकेतका रूपमा लिनु उपयुक्त छैन, किनकि भारतको आन्तरिक आर्थिक वृद्धि अझै पनि तीव्र गतिमा जारी रहेको छ।
यस परिवर्तनको मुख्य कारण भारतीय रुपैयाँ को अवमूल्यन हो। जब जीडीपीलाई अमेरिकी डलरमा रूपान्तरण गरिन्छ, कमजोर विनिमय दरका कारण अर्थतन्त्रको आकार सानो देखिन्छ। साथै जीडीपीको आधार वर्ष परिवर्तन तथा नयाँ गणना विधिले पनि कागजी रूपमा अर्थतन्त्रको आकार घटेको देखाएको छ। यद्यपि, अन्तर्राष्ट्रिय मुद्रा कोष का अनुसार भारत अझै पनि ६–७ प्रतिशतभन्दा बढी आर्थिक वृद्धि दर कायम राख्ने अपेक्षा गरिएको छ, जुन विश्वका प्रमुख अर्थतन्त्रहरूमध्ये उच्च दर हो।
विज्ञहरूको विश्लेषण अनुसार, अन्तर्राष्ट्रिय तुलना गर्दा आकार घटे पनि भारतको घरेलु अर्थतन्त्र भने बलियो नै छ। उपभोक्ता खर्च, पूर्वाधार विकास र सेवा क्षेत्रको विस्तारले आर्थिक आधारलाई मजबुत बनाएको छ। भविष्यमा कच्चा तेलको मूल्य घट्ने र विदेशी लगानी बढ्ने हो भने रुपैयाँ बलियो भई भारतको विश्व र्याङ्किङ पुनः सुधार हुने अपेक्षा गरिएको छ। धेरै अन्तर्राष्ट्रिय अनुमानहरूका अनुसार भारत सन् २०२७ सम्म पुनः चौथो स्थानमा पुग्ने र २०३० को दशकको सुरुवातसम्म विश्वको तेस्रो ठूलो अर्थतन्त्र बन्ने सम्भावना रहेको छ।
